Berisha paralajmëron shtrirjen e aksionit që nisi në Kuvend

Në komunikimin e përjavshëm me gazetarët, Sali Berisha bëri paralajmërimin e radhës për protesta dhe reagim jashtë institucional nga opozita.

Për Berishën, ajo që është parë në ditët e fundit në Kuvend me bojkot dhe bllokim të punimeve të seancës, është vetëm fillimi i një vale protestash të opozitës.

“Ne do qëndrojmë në parlament me protestën tonë më të fuqishme. Dhe kjo protestë, ju garantoj se nuk do mbetet vetëm në sallën e parlamentit. Dora dorës, gradualisht ajo do shtrihet në rrugë, në sheshe, në institucionet e tjera të vendit,” – deklaroi Berisha.

Si forma të të protestuarit, kreu i Rithemelimit nuk përjashtoi as grevën e urisë.

“Absolutisht greva e urisë është përmendur, ashtu siç thoni ju. Plotësisht!  Ka gatishmëri të vërtetë dhe është një opsion. Nuk ka diskutim, kjo është betejë. Ne e kemi nisur këtë, kur ai de facto na asgjësoi ne në parlament,” – u shpreh Berisha.

Por nga kjo dalje, Berisha nuk la pa sulmuar sërish Lulzim Bashën.

“E vërteta është se përpjekja dhe sakrifica e tyre e madhe, e veçantë, 90 ditë, ditë e net në bulevard në një çadër, u përdor për pazar në mënyrën më të shëmtuar,” – tha ai.

LEXONI GJITHASHTU:

• “Berisha-Rama sulm të koordinuar”, zëdhënësja e PD: Ortakët e kullave frikë nga SPAK
• Berisha: Përshëndes rezolutën e PE për Kosovën dhe Serbinë