Besimtarët ortodoksë festojnë ditën e Ujit të Bekuar

Besimtarët ortodoksë kanë festuar sot ditën e Ujit të Bekuar. Hedhja e kryqit në ujë dhe kapja nga të rinjtë, është simboli i kësaj feste të hershme.

Me dhjetëra besimtarë vlonjatë kanë marrë pjesë në ceremoninë e zhvilluar pranë Ujit të Ftohtë.

Kristi Komini është 19 vjeçari i cili për të dytin vit radhazi kap kryqin. Mes emocionesh ai shprehet se është një eksperiencë që duhet ta bëjnë të gjithë dhe besimi është frymëzim.

“Ishte kënaqësi si gjithmonë. Një eksperiencë shumë e bukur dhe si besimtar jam shumë krenar që kapa kryqin sot”, tha Kristi.

Festa e krishterë është mbajtur në juglindje të vendit, aty ku me qindra besimtarë të krishterë ortodoksë kanë mbushur katedralen e qytetit dhe vendin ku është hedhur kryqi.

Ishte Imzot Joan Pelushi ai që kryesoi ceremoninë, duke u lutur për paqe dhe harmoni.

Në fund të ceremonisë të gjithë kanë mbushur enët e tyre me ujin ku është hedhur kryqi, ujë i cili konsiderohet i bekuar e që duhet shpërndarë në familjarët për të shpërndarë paqen e begatinë.

Ceremonia është zhvilluar edhe në qytetin e Pogradecit, ku të rinjtë janë hedhur në ujërat e liqenit. Moti i butë dhe plot dhe diell, i ka favorizuar ato.

Pas bekimit të kryqit është bërë hedhja e tij më pas në liqen.