Bizneset në Vlorë kanë nisur kërkimet për krah pune që tani në dimër, për të përballuar sezonin turistik gjatë verës.

Për administratorët e njësive të shërbimit, nga viti në vit situata po vështirësohet. Edhe pse pagat tashmë sipas tyre janë të larta, mungon promovimi i nevojshëm dhe mungesa e informacionit bën që ky sektor të mos jetë ai i preferuari nga të rinjtë.

“Të rinjtë të cilët punojnë si kamerier apo banakier pranojnë se nga moshatarët shpesh ka paragjykime për këto profesion. Nëse je student, të ardhurat janë të mjaftueshme, por për të mbajtur një familje ato nuk dalin”, thotë Vasil Bedini, administrator ReGina Group, kreu i Shoqatës së Turizmit për Jugun.

Në Zyrën e Punësimit në Vlorë ka shkuar në 2332 numri i punëkërkuesve të papunë, nga të cilët 652 të moshës 16- 29 vjeç të cilët janë më shumë të orientuar drejt njësive të tregtimit si supermarkete apo fasoneri, që nuk kërkojnë shumë kualifikim.

Rritje të punësimit në sektorin e turizmit shënohet vetëm gjatë muajve të verës. Sektori i turizmit vijon të mbetet sezonal sa i përket punësimeve ndërsa moszbatimi i kodit të punës, oraret e tejzgjatura dhe pagesa e ulët janë disa nga shkaqet që mbajnë të rinjtë larg këtij sektori.

LEXONI GJITHASHTU:

• Turizmi mes pandemisë, masat kufizuese kundër COVID sollën humbje të pakthyeshme
• Turizmi në Shqipëri larg kthimit në normalitet