Blegtoria në zhdukje, 67-vjeçari mban gjallë fermën e fundit në Karkavec të Përrenjasit

Në një kohë kur blegtoria po braktiset gjithnjë e më shumë nga të rinjtë, 67-vjeçari Avni Kryemadhi vijon të mbetet aktiv në këtë sektor në zonën e Karkavecit në Përrenjas.

Prej më shumë se katër dekadash, ai merret me mbarështimin e bagëtive, ndërsa prej 25 vitesh zotëron një fermë me 30 lopë dhe 30 viça.

Së bashku me bashkëshorten, Avniu kujdeset për 60 krerë bagëti, një angazhim i përditshëm që sipas tij shoqërohet me lodhje të madhe fizike.

“Kam 25 vjet që merrem me këto lopët dhe është e lodhshme, pavarësisht se shteti na ka ndihmuar me këto subvencionimet e lopëve dhe të viçave. Janë gati 15 hektarë tokë, të mbjella me vreshta, jonxhë, të gjitha këto parcela. Dhe kur nuk blen bazë ushqimore, ke edhe fitimin”, është shprehur ai.

Gjatë verës, ai i zhvendos bagëtitë në Stravaj, në vendlindjen e tij, ku kullotat natyrore ofrojnë kushte më të mira për mbarështimin e tyre.

 “Stravaji ka pasur mbi 5.000 kokë bagëti, tani 300-400 kokë as nuk janë. Stravaji atje është një mrekulli, perlë, me fusha e male. Lopët nuk bëjnë si dikur zullum te fshatarët. I lëshojmë në mëngjes dhe i marrim në darkë”, ka vijuar më tej ai.

Sfidë për Kryemadhin mbetet mungesa e interesit të brezit të ri për t’u marrë me blegtori, pavarësisht se fëmijët e ndihmojnë në fermë.

“Ata që kanë shkollë të lartë jo e jo, por edhe ata me arsim të mesëm apo 9-vjeçar nuk e kanë dëshirën të rrinë me bagëtitë. Më ndihmojnë, por këtë pasion siç e kam unë nuk e kanë”, ka treguar Avniu.

Teksa numri i blegtorëve është ulur ndjeshëm ndër vite, Avni Kryemadhi vijon të mbajë gjallë një profesion që po zhduket në zonë, duke mbetur i vetmi blegtor aktiv në Karkavec të Përrenjasit.