Bllokohet një skaf në plazhin e Ksamilit, gjobitet drejtuesi

Një tjetër mjet lundrues, skaf është bllokuar në plazhin e Ksamilit, ndërsa drejtuesi i tij është gjobitur me  10 000 lekë të rinj pasi nuk kishte dokumentet përkatëse.

Policia Kufitare ka vijuar kontrollet përgjatë gjithë vijës bregdetare në Vlorë, Sarandë dhe Himarë dhe si rezultat i këtyre kontrolleve, numri i mjeteve lundruese të bllokuara gjatë kësaj jave ka shkuar në 7.

“Shkon 7 numri i mjeteve lundruese të bllokuara gjatë kësaj jave, nga DVKM Vlorë.

Bllokohet një tjetër mjet lundrues skaf, në plazhin e Ksamilit, dhe ndëshkohet me masë administrative 10 000 lekë të rinj, drejtuesi, pasi nuk posedonte dokumentacionin përkatës në bord.

Shërbimet e Policisë Kufitare të DVKM Vlorë dhe ato të Policisë Kufitare Sarandë, në zbatim të planit të masave të hartuar për forcimin e kontrolleve në det dhe në tokë, ndaj mjeteve lundruese për peshkim dhe atyre turistike, si dhe për të verifikuar ligjshmërinë e posedimit dhe drejtimit të këtyre mjeteve nga shtetas të ndryshëm, në të gjithë vijën bregdetare të qarkut, kanë evidentuar një tjetër rast të drejtimit të mjetit lundrues, në kundërshtim me ligjet në fuqi.

Policia Kufitare e Sarandës ka ndëshkuar me masë administrative 10 000 lekë të rinj, drejtuesin e një mjeti lundrues tip skaf, pasi gjatë verifikimeve ka rezultuar se nuk kishte dokumentacionin e nevojshëm në bord.

Mjeti lundrues skaf u bllokua deri në shlyerjen e masës administrative dhe pajisjen e drejtuesit të tij, me dokumentacionin përkatës”,-thuhet në njoftimin e policisë kufitare.