Çadra e Bashës futi në lojë ndërkombëtarët! Po Berisha?! E zbulon gazetari

Gazetari Genc Burimi, në një lidhje live për Euronews Albania, foli mbi protestën kombëtare të opozitës, e cila do të mbahet sot në orën 17:00.

Sipas gazetarit, PD-ja me protestën e tretë kombëtare kërkon zgjedhje të parakohshme dhe nuk i njeh zgjedhjet e majit. Ai theksoi gjithashtu se, PD-ja që të arrijë zgjedhje të parakohshme, nevojitet një negociatë tripalëshe bashkë me ndërkombëtarët, duke marrë shembullin e Maqedonisë së Veriut.

“Kjo opozitë zgjedhjet e majit nuk i njeh. Kauza është mohimi i zgjedhjeve dhe qëllimi është të kemi zgjedhje të parakohshme. Që të vish në zgjedhje të parakohshme në Shqipëri, këtë s’mund ta arrish kurrë përveçse me një negociatë tripalëshe bashkë me ndërkombëtarët, sepse Rama thotë unë kam fituar, pse duhet të bëj zgjedhje.

Këtë gjë mund ta imponojnë vetëm ndërkombëtarët. Shembull është rasti i Maqedonisë së Veriut, ku ishin ndërkombëtarët që hynë në lojë dhe u imponuan që të ketë zgjedhje.

Po ashtu, edhe çadrat pas zgjedhjeve të 2009-ës dhe çadrat e Bashës futën në lojë ndërkombëtarët. Pastaj, cili qe produkti final, kjo është gjë tjetër. Ishin pikërisht protestat me çadra që çuan Ramën dhe Berishën në Strasburg. Pse do të harxhonte kohë Strasburgu me Ramën dhe Berishën. Ishin çadrat që sollën numrin dy të Departamentit të Shtetit në Shqipëri në vitin 2017, pas çadrës së Bashës.

Ndërkohë, ndërkombëtarët sot nuk e kanë atë tendencë, por vetëm ndërmjetësim. Ti e pe fare mirë Kostën me Ramën qafë për qafë, por nuk pe ndonjë Berishë. Kjo lojë mund të prodhojë futjen më aktive të ndërkombëtarëve edhe me Kostën dhe deklaratën e Komisionit Europian.

Unë kam frikë se me këtë radikalizim, përtej PD, sepse herën e kaluar e pamë kolegen tuaj e cila qante dhe si puna e saj ke sot shumë të tjerë që do të bëjnë ndeshjen e kthimit, që duan hakmarrje, ti më provokove dhe unë kam të drejtën e provokimit. Ky është rreziku sot. Ky radikalizim i shërben PD-së dhe qëllimit të saj për zgjedhje të parakohshme, por mund të ketë më pas edhe të vrarë, si në zgjedhjet e 21 Janarit. Uroj që jo, por ata janë të ndikuar nga ajo që ndodhi herën e fundit”, u shpreh gazetari.