Çela dhe Dumani vizitë në Belgjikë, takim me Prokuroren e Përgjithshme Federale

Prokurori i Përgjithshëm, Olsian Çela, dhe drejtuesi i Prokurorisë së Posaçme, Altin Dumani, zhvilluan një vizitë zyrtare dyditore në Belgjikë, ku u pritën në një takim pune nga Prokurorja e Përgjithshme Federale e Belgjikës, Ann Fransen.

Vizita u zhvillua më 18 dhe 19 nëntor në Bruksel, si pjesë e bashkëpunimit të vazhdueshëm mes institucioneve të drejtësisë së dy vendeve.

Takimi koordinues u mbajt në kuadër të marrëveshjeve ekzistuese të bashkëpunimit dhe në vazhdën e kontakteve të një viti më parë në Tiranë. Diskutimet u përqendruan në çështje kyçe të luftës kundër krimit të organizuar, hetimeve financiare dhe pastrimit të parave, duke përfshirë edhe përdorimin e kriptomonedhave në aktivitete kriminale.

Palët diskutuan gjithashtu për forcimin e koordinimit në hetime dhe krijimin e skuadrave të përbashkëta hetimore, si dhe për çështjet e ndihmës juridike, përfshirë ekzekutimin e vendimeve penale dhe letërporosive.

Të dy delegacionet vlerësuan pozitivisht bashkëpunimin aktual dhe theksuan rëndësinë e zgjerimit të mëtejshëm të tij përmes shkëmbimit më të plotë të informacionit, me synim goditjen efektive të aktiviteteve kriminale që prekin të dy vendet.

Në fokus të diskutimeve ishte edhe rritja e efektivitetit në zbatimin e legjislacionit antimafia, me theks të veçantë te sekuestrimi dhe konfiskimi i aseteve kriminale të subjekteve të hetuara ose të dënuara në Shqipëri dhe Belgjikë.