Çerdhet dhe kopshtet hapen më 1 qershor, rregullat që nga hyrja

Komitetit teknik i Ekspertëve ka miratuar udhëzuesin e Institutit të Shëndetit Publike sa i takon hapjes së çerdheve dhe kopshteve më 1 qershor. Në këtë udhëzim parashikohet se si duhet të kryhet dërgimi dhe marrja e fëmijëve si dhe distancimi shoqëror gjatë qëndrimit në kopësht dhe çerdhe.

Gjithashtu janë përcaktuar rregullat për higjienën në mjediset e kopshteve dhe çerdheve dhe deri tek dezinfektimi i lodrave si dhe rekomandohet që dërgimi i fëmijëve të bëhet nga prindërit dhe jo nga gjyshërit.

Në rregulla është përcaktuar se, në një tavolinë me 10 karrige duhet të ulen vetëm 5 fëmijë. Fëmijët e një grupi duhet të qëndrojnë në të njëjtën sallë/dhomë çdo ditë dhe me të njëjtën edukatore.

Fëmijët duhet të shoqërohen nga njëri prind, i cili qëndron jashtë ambienteve të institucionit dhe pret në distancë 1.5 m nga prindërit e tjerë për ta dorëzuar fëmijën tek personeli i çerdhes ose kopshtit.

Gjithmonë fëmijët do të shoqërohen brenda institucionit nga një edukatore. Ndërsa një person i caktuar nga drejtuesi i institucionit duhet të bëjë çdo ditë matjen e temperaturës për fëmijët si dhe pastrimin e duarve me solucion higjenizues.