Çështja “McGonigal” | PD-ja kërkesë Kuvendit: Mocion me debat dhe pa limit kohor

Partia Demokratike ka dorëzuar në Kuvend kërkesën për ndryshimin e rendit të ditës të seancës së nesërme, ku kërkohet mocion me debat pa limit kohor, duke i dhënë mundësinë çdo deputeti të shprehet.

Përmes një shkrese zyrtare drejtuar kryetares së Kuvendit, Lindita Nikolla, deputetët kërkojnë që në seancën e nesërme të kenë kohë pa limit për diskutuar për çështjen e “McGonigal” dhe përfshirjen e emrit të kryeministrit Edi Rama në aktakuzën amerikane.

“Duke patur parasysh përmasën e jashtëzakonshme të këtij skandali te paprecedente, ku Kryeministri shqiptar Edi Rama përfshihet si subjekt hetimi dhe akuzash për përfshirje në korrupsion nderkombetar, minimin e besimit të publikut ndaj institucioneve të shtetit shqiptar dhe cënimin e marrëdhënieve politike dhe diplomatike ndërshtetërore ndërmjet Shqipërisë dhe Shteteve të Bashkuara të Amerikës; si de, bazuar ne Nenin 31 pika 2 dhe Nenin 98 te Rregullores se Kuvendit, një grup deputetësh kërkon:

1. Ndryshimin e Rendit të Ditës të seancës së datës 02.02.2023, ora 10.00 ;
2. Ne përputhje me piken 1, përfshirjen si pikë e parë e Rendit të Ditës të një Mocioni me Debat për çështjen e mësipërme.
3. Kerkojmë që Debati të mos ketë limit kohor, duke i dhënë mundësine çdo deputeti të shprehet.

Kryetarja e Kuvendit të mbledhë menjëhere pas dorezimit të kesaj kërkese, Konferencën e Kryetarëve, para fillimit të Seancës Plenare date 2 Shkurt 2023, ora 10.00, për të bërë ndryshimin e Rendit të Ditës të kësaj seance sipas kerkesës se mësipërme”, thuhej ndër të tjera në kërkesë.

Seanca plenare e së enjtes pritet të sjellë përballjen e kryeministrit Edi Rama me opozitën për çështjen e përfshirjes së tij me ish zyrtarin e FBI, Charles Mcgonigal që po hetohet në Amerikë.

Në këtë seancë pjesëmarrja e opozitës nuk do të jetë e plotë. 5 deputetë të Partisë Demokratike nuk do të marrin pjesë në punimet e Parlamentit pasi janë të përjashtuar për shkak se 1 javë më parë bllokuan foltoren e Kuvendit duke pamundësuar zhvillimin e seancës.

Sali Berisha, Flamur Noka, Edi Paloka, Edmond Spaho dhe Belind Këlliçi nuk do të marrin pjesë në seancën plenare dhe as në komisionet parlamentare për 10 ditë.

LEXONI GJITHASHTU

• ‘McGonigal’ nesër në interpelancë, Rama përballet me opozitën në Parlament
• Berisha: Rama-McGonigal bënë një grusht shteti kundër pluralizmit
• Dosja e bujshme në SPAK, kryebashkiaku që mund të digjet nga Rama