“Çfarë nuk të vret të forcon”, Rama: Tirana pret miq të mëdhenj në 16 maj

“Çfarë nuk të vret të forcon” me këto fjalë e përfundoi kryeministri Edi Rama takimin me punonjësit e Bashkisë së Tiranës të mbajtur këtë të enjte në Sheshin Skënderbej.

Gjatë fjalës së mbajtur Rama tha se ai nuk është dakord me dërgimin në burg të kryebashkiakut Erion Veliaj pa gjyq, por sipas tij, këto janë kostot e një drejtësie që është ende në fillimet e veta të pavarësisë, ndaj siç u shpreh ai nuk mbetet tjetër “veçse të shtrëngojmë dhëmbët”.

Rama tha se ndërkohë që përgatit për zgjedhjet, Tirana ka edhe një tjetër ngjarje të rëndësishme që pritet të zhvillohet më 16 maj ku pritet të mbahet Takimi i Komunitetit Politik Europian, për të cilin kryeqyteti duhet të nisë nga përgatitjet.

“Transformimi historik i Tiranës duhet të vazhdojë me ju në pararojë. Këto muaj Bashkia e Tiranës duhet të zgjohet edhe më herët, dhe të flejë edhe më vonë. Tirana ka zgjedhje për të mbajtur në 11 maj, por ama Bashkia e Tiranës ka miq të mëdhenj për të pritur në 16 maj. Unë do jem këtu me ju dhe për ju me Tiranën, për të gjithë Shqipërinë.

Ditën dhe natën me kokën lartë, me mendjen e ndarë, me zemrën në vendin e duhur dhe bashkë me çdo shqiptar e shqiptare që flamurin nuk e ka vetëm në stadium, por e ka në zemër, në mendje dhe e ka në dritën e syve të vetë, që nga Tirana e gjithë prejardhjeve e deri te Shqipëria që sytë i ka te Tirana. Çfarë nuk të vret të forcon, ditët më të mira janë të gjitha përpara”,-tha kryeministri Rama në mbyllje të takimit me punonjësit e Bashkisë së Tiranës.

LEXONI GJITHASHTU:

• Rama me punonjësit e Bashkisë së Tiranës: Sfidë, më gjeni një shkollë kur këneta…
• “Unë nuk iki, kam një luftë për të mbaruar”, Rama: Balta e varrezave të Sharrës…