Çfarë pritet nga protesta, PD mbledh aleatët në seli: Tirana në duart e qytetarëve

Pasditen e 26 nëntorit Partia Demokratike bashkë me aleatët e saj ka thirrur sërish një protestë kombëtare. Ky tubim i lajmëruar vetëm para pak ditësh nga Sali Berisha do të jetë vijim i mosbindjes civile që opozita ka nisur që prej fillimit të tetorit, ku nisën protestat dhe tensionet në Kuvend.

Pas mbledhjes me drejtuesit politik të PD, kryetarët e degëve dhe strukturave të tjera të partisë, këtë të hënë ishte radha e partive aleatë që u mblodhën në selinë blu për organizimin e protestës së 26 nëntorit.

Flamur Noka, u shpreh gjatë fjalës së tij se situata është e tillë, që tashmë duhet një reagim dhe një përgjigje edhe nga opozita.

“Tashmë është radha jonë, është radha e opozitës, është radha e shqiptarëve që të flasin. Nesër në ora 17:00 është radha e qytetarëve që Tirana të jetë nën pushtetin e tyre”, tha Noka.

Mësohet se protesta do të nisë prej orës 17:00 dhe pritet që të zgjasë disa orë gjatë mbrëmjes së 26 nëntorit. Skenari që përflitet në korridoret e selisë blu janë për një protestë të ngjashme me atë të 7 tetorit, ku për disa orë qytetarët paralizuan jetën normale brenda Unazës së Vogël të Tiranës. Do të jenë disa pika kyçe të Tiranës që do tentohen të bllokohen nga protestuesit.

LEXONI GJITHASHTU:

• Protesta e së martës/ Paralajmërimi i Berishës: Mos prekni protestuesit e zemëruar
• Berisha mbledh drejtuesit e qarqeve, zbardhen skenarët e protestës së opozitës