“Çmenduri ajo që po ndodh në Gaza”, eksperti: Shumë më tepër viktima se në Ukrainë

Eksperti i marrëdhënieve ndërkombëtare Ferdinand Gjana ishte këtë të hënë në Euronews Albania ku komentoi ndër të tjerat luftën e ndodhur në Gaza.

Ai tha se gjenocidi që po ndodh atje , është një çmenduri pasi ndonëse është luftë më e shkurtër se ajo në Ukrainë, numri i civilëve të vrarë është shumë herë më i lartë.

Gjana tha se gjithnjë e më shumë po duket se Netanjahu është i vetëm në luftën që ai po bën pasi edhe populli izraelit nuk e mbështet plotësisht.

“Që në momentin e parë kur filloi ky konflikt, skenari nuk ishte shumë skenar spontan, nuk dukej ai sulmi i Hamasit, ka qenë i planifikuar por ka pjesë që i dimë e pjesë që nuk i dimë dhe çdo ditë që kalon po tregon se në fakt ky është një plan shumë i gjerë dhe kompleks. Sot shpërbërja e kabinetit të luftës apo shpërndarja e qeverisë tregon se Netanjahu në këtë proces është në vetmi të madhe.

Patjetër që ai ka mbështetje, por këto nuk janë aktor politik, nuk janë populli i Izraelit. ata e mbështesin në disa pjesë por jo në gjithë këtë proces dhe të gjitha ato që po ndodhin sidomos pjesa që bie ndesh me ligjin e luftës dhe të drejtat e njeriut. E gjithë kjo që po ndodh është një çmenduri e cila nuk dihet se kur do përfundojë. Ne kemi në luftë në Ukrainë ku kemi shumë viktima, ndërsa lufta në Gaza është shumë më e shkurtër dhe numri i viktimave është shumë i lartë”,-tha eksperti Gjana.