Çmimet e larta: Qytetarët bojkotojnë supermarketet në RMV, bien 50% blerjet

Thirrjet për bojkotin e marketeve në Maqedoninë e Veriut u përqafuan nga qytetarët, duke bërë që shumica e bizneseve të pësojnë humbje ditore gati 50%. Por bojkoti është paralajmëruar edhe për ditën e premte, nismë që është mbështetur edhe nga qeveria.

Gazetarja e Euroneës Albania Ferika Iljazi deklaroi se bojkoti do të vijojë dhe të premten.

“Maqedonia e Veriut po përgatitet për një bojkot të dytë të marketeve gjatë ditës së nesërme, që në rrjetet sociale është quajtur si ‘E premtja e zezë’. Kjo pas suksesit të bojkotit të parë që ndodhi më 31 janar të këtij viti, në të cilin fitimi i marketeve thuajse u përgjysmua,” tha ajo.

Thirrja për bojkot përkrahet nga kryeministri, ministrat dhe zyrtarë të tjerë, por qeveria ende nuk ka marrë asnjë masë për të ndihmuar tregtarët për uljen e çmimeve të ushqimeve dhe produkteve higjienike.

“Është e drejtë legjitime e qytetarëve që të bojkotojnë. I kuptojmë dhe i përkrahim. Disa tregtarë kanë rritur çmimet duke dëmtuar buxhetin e qytetarëve apo familjeve pa ndonjë arsye, logjikë apo bazë ekonomike. Inspektorati i tregut është në terren”, deklaroi ministri i Ekonomisë në RMV, Besar Durmishi.

Sipas analizave të Lidhjes së Sindikatave të Punëtorëve, nga viti 2022 e deri më tani, çmimet e produkteve bazë për familjet thuajse janë dyfishuar. Apo afërsisht një familje katër anëtarëshe ka nevojë për rreth 1,000 ose 1,200 euro në muaj, nëse banon me qira, për të mbuluar nevojat elementare.