Dakordësia me opozitën|Spiropali: Ngritja e Komisioneve Hetimore, e drejtë e pakicës

Deputetja e Partisë Socialiste është shprehur është një shenjë e mirë që një pjesë e opozitës (Rithemelimi) do i kthehet jetës parlamentare normalisht, pas marrëveshjes së arritur sot me PS për ngritjen e dy komisioneve hetimore.

Komentet Spiropali i bëri përmes një deklarate për mediat, ku tha se radikalizimi në politikë nuk të çon askund, por sipas saj, janë debatet dhe alternativat që i japin peshë një force politike.

Ajo tha gjithashtu se nuk ka pasur negociata sekrete dhe shtoi se është vota e shqiptarëve ajo që përcakton fitoret dhe humbjet dhe jo tryezat.

“Isha shumë e kënaqur sot kur i pashë në konferencën e kryetarëve kolegët e mi, Tabakun, Bardhin, etj dhe ashtu duhet të jetë gjithmonë. Thirrjet tona kanë qenë të përsëritura për të bërë atë që bëmë sot.

Ngritja e Komisioneve Hetimore është një e drejtë e deputetëve dhe e opozitave për të kërkuar llogar dhe që na jep ne mundësinë për llogaridhënie. Është ditë e mirë që një pjesë e opozitës ka vendosur sot që këtë të drejtë kushtetuese ta shfrytëzojë në Kuvend, pasi ajo aty ka qenë. Fitoret dhe humbjet tona i përcakton vota e shqiptarëve dhe jo tryezat.

Nuk ka pasur mes nesh tryeza të fshehta apo të hapura, por janë institucionet e Kuvendit që krijojnë ura për komunikimin politik mes forcave. As bojkoti i zgjedhjeve, as djegia e mandateve, as bilbilat, nuk e rrit besimin e qytetarëve te një forcë politike. Alternativa, debati, fjala e bën këtë. Radikalizimi nuk është flamur fitoreje, por mund të jetë jorgan për të mbuluar problemet e brendshme”, tha Spiropali.

LEXONI GJITHASHTU:

• Konferenca e Kryetarëve| Bardhi: S’na i mohoni dot të drejtën për komisione hetimore
• Dakordësia me opozitën, Çuçi: Rikthyem dialogun, çfarë u vendos për komisionet