Debate në Këshillin e Mandateve për Ahmetajn, Kuvendi: Seanca të mbahet të hënën

Ka nisur me debate, Mbledhja e Këshillit të Mandateve, ku po shqyrtohet kërkesa e SPAK për autorizimin e arrestimit të Arben Ahmetaj.

Ka qenë deputeti i Partisë Demokratike Gazment Bardhi, ai i cili u përplas me Kryetaren e Kuvendit në lidhje me mospërfshirjen në seancën plenare të ditës së nesërme të votimit për dhënien e autorizimit të prokurorisë për arrestimin e ish-zv. kryemninistrit.

Sipas deputetit të PD, maxhoranca po i jep kohë Ahmetaj që të fshihet duke penguar drejtësinë të veprojë.

“Po bashkëpunoni në krim, mos i jepni më shumë kohë Arben Ahmetajt që të fshihet. Boll e zvarritët çështjen. Të përfshihet në Rend Dite të seancës plenare të ditës së nesërme dhe të japim autorizimin prokurorisë që të veprojë. Mos pengoni drejtësinë. Opozita e ka gati raportin, të veprojmë pa asnjë vonesë, të shqyrtojmë e miratojmë nesër”, tha Bardhi.

Bëhet me dije se nga ana e Kuvendit është kërkuar që seanca në Kuvend për Ahmetajn të mbahet të hënën në orën 17:00, por që ende nuk ka kaluar në votim.

Kujtojmë se Prokuroria e Posaçme ka kërkuar nga Kuvendi heqjen e imunitetit për Ahmetaj dhe arrestimin e tij. Ish-zëvendëskryeministri rezulton se është larguar nga Shqipëria para se kërkesa të dorëzohej në Parlament. Kreu i Prokurorisë së Posaçme Altin Dumani deklaroi në mbledhjen e mbajtur dje se të gjitha provat që janë mbledhur justifikojnë kërkesën për arrestimin e deputetit.

Për të ndjekur kanalin e youtube të Euronews Albania KLIKO KËTU! 

LEXONI GJITHASHTU: 

• VOA: Ahmetaj u largua pak orë para kërkesës për arrestim, sinjali i fundit Kanadaja
• Spahiu: Vendet ku mund të ketë shkuar Arben Ahmetaj për të marrë azil politik
• Largimi i Ahmetaj, Avokati: Rëndon pozitat e tij penale, dënimi më i lartë