Debate për listat në PD-në e Korçës, kandidati Andrea Mano i pakënaqur me listat, Salianji shpjegon situatën

Debate të forta kanë karakterizuar mbledhjen e degës së Partisë Demokratike në qarkun e Korçës pas publikimit të listave të kandidatëve.

Euronews Albania kontaktoi disa nga kandidatët e PD në këtë qark, të cilët treguan se debatet kanë nisur fillimisht nga kandidati Andrea Mano, ish-prefekt i qarkut të Korçës.

Ky i fundit mësohet se ka kërkuar llogari për listat, duke u shprehur se e gjithë kjo do të reflektojë me punën në terren.

Por më pas ka ndërhyrë drejtuesi politik i këtij qarku, Edmond Spaho, i cili është shprehur se qëllimi është që kjo parti të vijë në pushtet, dhe askush nuk duhet të luftojë për ego personale por për marrjen e pushtetit në 25 Prill.

Për situatën, Euronews Albania ka intervistuar kandidatin për deputet Ervin Salianji, i cili mohon të ketë pasur debate brenda degës së PD në Korçë.

“Andrea Mano është një prej njerëzve që kanë kontribuar më shumë në PD e Korçës.

Është një listë e kaluar nga kryesia dhe të gjitha forumet vendimmarrëse. Të gjithë kandidatët e PD punojnë si ekip për të fituar. Renditja i takon strukturave të larta vendimmarrëse, ne na takon ta kthejmë në votë për të bërë të mundur ndryshimin.

Në dijeninë time nuk ka pasur pakënaqësi, ka vetëm punë, punë për të sjellë ndryshimin”, u shpreh ish-deputeti demokrat për Euronews Albania.