Deklarata e Ramës për GJK, Berisha: U zotua të mos përfillë vendimin, kërcënoi edhe Evropën

Kryetari Partisë Demokratike, Sali Berisha akuzoi kryeministrin Rama se po injoron vendimet e Gjykatës Kushtetuese dhe po cenon shtetin ligjor.

Sipas Berishës, veprimet e qeverisë rrezikojnë rrugën e Shqipërisë drejt Bashkimit Evropian.

“Edi Rama në panik dhe i fantaksur, o zotua para jush në mënyrën më të papërgjegjshme se ai nuk do të përfillë vendimin e Gjykatës Kushtetuese, mbasi sipas tij, nuk ka ndodhur kurrë që një ministër të pezullohet nga gjykatat. Ky është një mashtrim i madh sa vetë Edi Rama. Në rajon, në Europë dhe në botë, gjykatat kanë pezulluar jo vetëm ministra, por edhe kryeministra. Sot në monologun e tij, ai kërcënoi dhe Europën, i tha se, alternativë e vetme për Shqipërinë në Europë, jemi ne hajdutët e mëdhenj, ne që asgjësojmë shtetin ligjor dhe nuk njohim ligj e as Kushtetutë. Mirëpo nesër sipas medieve, ai është thirrur pikërisht për ti komunikuar vendimin që është marrë në rast se ky, pengon sistemin e drejtësisë dhe veprimtarinë e tij. Dhe ky vendim, do të jetë mesa duket vendimi më i paprecedentë që është marrë ndonjëherë në BE, sepse është absolutisht i paprecedentë qëndrimi dhe vendimi i Edi Ramës, për të asgjësuar shtetin ligjor me një grusht shteti, brenda shtetit”, tha Berisha në një videomesazh në rrjetet sociale.

Berisha u bëri thirrje qytetarëve të mobilizohen për protestën e së martës që do të zhvillojë opozita përpara kryeministrisë. 

“Ju ftoj të marrim fatet në dorë të Shqipërisë, ti qëndrojmë ligjeve dhe kushtetutës së vendit, si rruga e vetme e integrimit të Shqipërisë në BE, si rruga e vetme për rivendosjen e shtetit ligjor, ligjit dhe kushtetutës në Shqipëri”, përfundoi Berisha në mesazhin e tij.