Dëmtohen 50 hektarë grurë, stuhia në Korçë prish kulturat e mbjella

Stuhia që përfshiu juglindjen e vendit të mërkurën ka sjellë dëme në bujqësi. Fermerët e fshatrave Turan dhe Goskovë në Korçë që njihen si kultivues të kulturës së grurit, tregojnë se dëmi është i konsiderueshëm e se gruri i prekur nga stuhia nuk do të ketë prodhim.

“Kostoja ime në 7 hektarë ka shkuar 8 milion e 720 mijë. Deri tani. Këtu janë të gjithë, ure, dap, plehërime. Këtu nuk marr dot asgjë. Janë 7 hektarë në total, 6 është prishur i tëri. Nuk bëhet as për bagëtitë, nuk thahet. Është bërë si thekër. Po të vere dore shtetin, po nuk vuri dorë. Nuk kemi marrë asnjëherë”, -tha një fermer.

“Në 5 hektarë, 2.5 hektarë i kam të dëmtuara unë personalisht. Fshataret e tjerë kanë shumë, kanë njerëz që kanë mbjellë mbi 150 hektarë, është në masë të madhe. Gruri ishte i mirë, pretendonim të merrnim prodhim të mirë por fshatarin e zë trari nga e rënda”,-tha fermeri.

Për kryeplakun e fshatit Turan dëmi mendohet të jetë afro 50 hektarë.

Ai shpreson që shteti të verifikojë dëmet dhe të dëmshpërblejë fermerët, pasi në të kundërt do shkojnë drejt falimentit.

“Nga reshjet dje kanë bërë dëm të konsiderueshëm, rreth 50 hektarë grurë dhe elb. Është dëm shumë i madh për fermerët e fshati tonë sepse kanë investuar, kanë bërë, ky prodhim iku kot nga një fatkeqësi natyrore. Erdhi drejtoria e bujqësisë të marrë shifra sa dëm është bërë por asnjëherë nuk kemi marrë dëmshpërblim, edhe pse ky rast është me i madhi, ka shtrirë gjithë grurin e elbin”,-tha Iliran Skënderasi, kryeplaku i fshatit Turan.

Kjo është hera e disatë që prodhimet e fermerëve në juglindje preken nga fatkeqësitë natyrore, ku në asnjë rast shteti nuk i ka dëmshpërblyer.

LEXONI GJITHASHTU:

• Paga mesatare bie 2% për shkak të euros, sektori privat ndikohet nga këmbimi i ulët
• Zyrtarët: Ukraina ka çliruar disa territore rreth Zaporizhzhia