Depozituan mbetje ndërtimi në plazh, arrestohet inxhinieri i objektit në Dhërmi

Një aksion i Policisë së Himarës, në bashkëpunim me Agjencinë e Zhvillimit të Territorit dhe Inspektoratin Kombëtar të Mbrojtjes së Territorit, çoi në ndalimin e punimeve dhe bllokimin e një objekti hotelerie në zonën turistike të Gjilekës, në Drimadhë, pasi u konstatuan shkelje serioze mjedisore dhe administrative.

Gjatë kontrolleve u zbuluan depozitime të paligjshme të mbetjeve inerte ndërtimi në vijën bregdetare, të cilat shkaktuan ndotje në plazh dhe dëmtuan ambientin përreth. Po ashtu, disa nga vilat e ndërtuara ishin vënë në përdorim, edhe pse nuk kishin përfunduar procedurat ligjore të certifikimit.

Në përfundim të veprimeve procedurale, policia arrestoi inxhinierin zbatues të projektit, shtetasin A. Dh., 26 vjeç, i cili akuzohet për veprën penale “Menaxhimi i mbetjeve”.

IKMT ndërkohë ka bllokuar objektin në ndërtim dhe vilat përreth tij deri në marrjen e masave për eliminimin e shkeljeve të konstatuara.

Materialet procedurale janë referuar Prokurorisë së Vlorës për veprime të mëtejshme.

Policia e Vlorës thekson se mbetet e angazhuar për mbrojtjen e zonave turistike dhe mjedisit, duke paralajmëruar masa të ashpra ndaj çdo subjekti që shkel ligjin.