Deputetët e PACE-s: Polarizimi politik në Kosovë rrezikon demokracinë

Kosova ka bërë përgatitje të mira për zgjedhjet parlamentare të 9 shkurtit, por rritja e polarizimit politik mund të minojë demokracinë, sipas një delegacioni të Asamblesë Parlamentare të Këshillit të Evropës (PACE).

Delegacioni, i përbërë nga Petra Bayr dhe Andrea Eder-Gitschthaler nga Austria dhe Mehmet Akalin nga Turqia, përmbylli një vizitë parazgjedhore në Prishtinë, ku zhvilloi takime me krerë shtetërorë, përfaqësues ndërkombëtarë dhe pjesëtarë të shoqërisë civile.

Sipas PACE-s, fushata zgjedhore po zhvillohet në mënyrë paqësore, por shqetësuese mbetet ndikimi i keqinformimit dhe përdorimi i inteligjencës artificiale gjenerative, veçanërisht në mungesë të rregullimit të mediave online dhe transparencës mbi pronësinë e tyre

Delegacioni ngriti shqetësime për hezitimin e disa partive politike për të marrë pjesë në debate televizive dhe bojkotimin e tri stacioneve të mëdha televizive nga partia në pushtet, duke theksuar se këto veprime dëmtojnë informimin publik, sidomos të të moshuarve.

Bayr, Eder-Gitschthaler dhe Akalin theksuan rëndësinë e mediave në ofrimin e informacioneve të sakta dhe të larmishme, duke e cilësuar këtë si thelbësore për procesin demokratik dhe për një votim të informuar.

Ata bënë thirrje për veprime të përgjegjshme dhe gjithëpërfshirëse për të adresuar tensionet politike dhe për të mbrojtur procesin demokratik në vend.

LEXONI GJITHASHTU:

• Lajçak e Vuçiç zhvillojnë takim në Davos, diskutojnë për dialogun Kosovë-Serbi
• Osmani takon ambasadorin Tunç Angılı: Turqia mbështetëse e fuqishme e Kosovës