“Derbi i Italisë” me 7 gola, Juventus mposht Interin në minutat e fundit

Një përballje dramatike mes Juventusit dhe Interit në raundin e tretë të Serie A përfundoi me fitoren 4-3 të bardhezinjve, në një ndeshje që prodhoi emocione, përmbysje dhe skena spektakolare. Dueli në “Allianz Stadium” u karakterizua edhe nga një fakt i rrallë: të dy vëllezërit Thuram ishin protagonistë në dy porta të ndryshme.

Ndeshja u zhbllokua shpejt nga “Zonja e Vjetër”, me Kelly që realizoi në minutën e 14-të. Por Interi nuk vonoi të reagonte: Calhanoglu barazoi në të 30-ën me një goditje të fuqishme nga distanca. Yildiz riktheu epërsinë për Juven me një supergol në minutën e 38-të, duke e çuar rezultatin 2-1 në përfundim të pjesës së parë.

Pjesa e dytë nisi me një Inter më kërkues, që përmbysi gjithçka falë golave të Calhanoglu dhe Marcus Thuram në minutat 65 dhe 76, duke e çuar rezultatin në 2-3 për zikaltërit. Por Juventusi nuk u dorëzua. Në minutën e 83-të, ishte Khephren Thuram ai që barazoi shifrat me një goditje të saktë, ndërsa në minutat shtesë, Adzic i dha fitoren spektakolare bardhezinjve me një eurogol.

Ky ishte suksesi i 111-të për Juventusin në “Derbin e Italisë”, kundrejt 70 fitoreve të Interit. Me këtë triumf, Juventusi merr kryesimin e Serie A me 9 pikë të plota pas tre javësh.

LEXONI GJITHASHTU:

• Kalimi te Juventusi, Albin Kurti videotelefonatë me Edon Zhegrovën: Krenarë për ty
• VIDEO/ Juventus siguron Zhegrovën, Isak transferohet te Liverpool