Deri 130 km/h, Rama: Milot-Fier aks shpejtësie me certifikatë të BE

Autostrada prej 114 km Milot-Fier pjesë e Korridorit Blu do të jetë aks shpejtësie me certifikatë të BE që do të t’i shërbejë ekonomisë dhe turizmit të zonave përreth.

Kështu tha kryeministri Edi Rama në aktivitetin e hapjes së garës ndërkombëtare për ndërtimin e këtij aksi.

Rama tha se me këtë aks mbyllet një pjesë e madhe e rrjetit kryesor të Shqipërisë.

“Do të jetë një aks me certifikatë të BE-së, në sensin që nuk do ketë nga ato trampolinat, pishinat, depot, magazinat që pozojnë në dy anët e rrugës duke krijuar një rrezik. Do të jetë një aks shpejtësie dhe do të jetë një vlerë e shtuar e lëvizjes nga Rruga e Kombit drejt Durrësit. Nuk është i gjithë segmenti, është një pjesë e tij. Segmenti vazhdon më tej në pjesën jug-lindore të vendit, por është pjesa më strategjike dhe kritike e korridorit blu. Gara do të jetë e suksesshme nga mënyra si është realizuar. Me këtë korridor mbyllet një pjesë e madhe e rrjetit kryesor të Shqipërisë”, tha Rama.

Aksi Milot-Fier do të jetë autostrada e parë në Shqipëri që do të ketë shpejtësi maksimale që arrin deri në 130 km/h.

LEXONI GJITHASHTU:

• Hapet gara për ndërtimin e Milot-Fier, Balluku: Ndikim të ndjeshëm në ekonomi