Serbia e ka refuzuar takimin me kryenegociatorët më 17 shtator të përcaktuar nga ndërmjetësi i Bashkimit Evropian, Miroslav Lajçak, ka thënë të premten e 13 shtatorit zëvendëskryeministri i Kosovës, Besnik Bislimi, duke i reaguar raportimit të media shtetërore serbe “Tanjug” se pala kosovare refuzoi takimin.

Në një reagim në rrjetin social “X”, Bislimi ka thënë se Serbia u mundua të imponojë pika të rendit të ditës “të destinuara për konsum të brendshëm politik”.

Kryenegociatori i Kosovës e ka ftuar ndërmjetësin për dialogun Miroslav Lajçak “të mohojë dezinformimin e qëllimshëm nga mediat serbe, të cilat thonë në mënyrë të rreme se Kosova ka refuzuar takimin trepalësh të kryenegociatorëve”.

Më 6 shtator, Lajçak vizitoi Kosovën nga ku u shpreh pas takimit me zëvendës-kryeministrin Besnik Bislimi se është arritur “pajtimi për takimin e radhës” – por nuk dha detaje të tjera. Më pas, më 10 shtator, emisari sllovak vizitoi edhe Serbinë “për përgatitjen për takimin e ardhshëm në nivel të kryenegociatorëve”.

Por siç ka raportuar “Tanjug”, Serbia ka kërkuar që në diskutim të përfshihet edhe çështja e Urës së Ibrit dhe formimi i Asociacionit.

LEXONI GJITHASHTU:

• Takimi me Lajçak, Vuçiç: Do prezantoj kërkesat pas sulmeve ndaj serbëve në Kosovë
• Provokojnë mediat serbe: Vuçiç mund të shpallë sot Kosovën territor të pushtuar