Detaje nga finalja e Botërorit të Mundjes, Valiev pësoi dëmtim të rëndë në gju

Menjëherë pas humbjes në finalen e Kampionatit Botëror të Mundjes ndaj rivalit japonez, ka reaguar edhe Federata Shqiptare e Mundjes, e cila njofton se mundësi Chermen Valiev pësoi një dëmtim të rëndë në ligament, megjithatë zgjodhi të vazhdonte garën.

Federata i uron sportistit shërim të shpejtë ndërsa janë publikuar dhe foto të mundësit me këmbën e fashuar.

Kështu, Chermen Valiev i dhuron Shqipërisë një tjetër medalje pasi u rendit i dyti në Botërorin e Mundjes të zhvilluar në Kroaci, duke fituar medaljen e argjendtë në peshën 74 kilogramë.

“Në përballjen finale, Chermen Valiev tregoi shpirtin e një kampioni të vërtetë. Pavarësisht një dëmtimi të rëndë në ligament, ai zgjodhi të mos dorëzohej dhe vazhdoi garën me guxim e forcë të jashtëzakonshme. Dhimbja dhe pamundësia fizike nuk e lanë të triumfonte ashtu siç e meritonte, por nuk e ndaluan dot të siguronte një medalje të argjendtë të madhe për Shqipërinë. Shërim të shpejtë, kampion! Je shembulli i sakrificës, forcës dhe krenarisë sonë!”, thuhet në postimin e Federatës Shqiptare të Mundjes.

Kujtojmë që pasditen e kësaj të hëne, Chermen Valiev u mposht në finalen e Kampionatit Botëror të Mundjes, duke humbur mundësinë për të fituar medaljen e artë.
Mundësi që përfaqëson Shqipërinë garoi në peshën 74 kg dhe u mposht në finale me rezultatin 8-2.

LEXONI GJITHASHTU:

• Valiev nuk e realizon ëndrrën e artë, mposhtet në finalen e Botërorit nga Takahashi
• “Tradhtar”- Mundësi Valiev reagon për incidentin me Mamiashvili: S’i detyrohem asgjë