Valiev nuk e realizon ëndrrën e artë, mposhtet në finalen e Botërorit nga Takahashi

Chermen Valiev u mposht në finalen e Kampionatit Botëror të Mundjes, duke humbur mundësinë për të fituar medaljen e artë.

Mundësi që përfaqëson Shqipërinë garoi në peshën 74 kg dhe u mposht në finale me rezultatin 8-2, duke u shpërblyer me medaljen e argjendtë.

Ai ishte favorit i padiskutueshëm në fillim të duelit, pasi renditet i pari në botë, por u mund nga japonezi Kota Takahashi, i cili mban vendin e 25-të në renditjen botërore.

Pas humbjes në finalen e Botërorit, ka reaguar edhe Federata Shqiptare e Mundjes, e cila shkruan se mundësi pësoi një dëmtim të rëndë në ligament, megjithatë vazhdoi garën. Federata i uron sportistit shërim të shpejtë.

“Në përballjen finale, Chermen Valiev tregoi shpirtin e një kampioni të vërtetë. Pavarësisht një dëmtimi të rëndë në ligament, ai zgjodhi të mos dorëzohej dhe vazhdoi garën me guxim e forcë të jashtëzakonshme. Dhimbja dhe pamundësia fizike nuk e lanë të triumfonte ashtu siç e meritonte, por nuk e ndaluan dot të siguronte një medalje të argjendtë të madhe për Shqipërinë.

Shërim të shpejtë, kampion! Je shembulli i sakrificës, forcës dhe krenarisë sonë!”, thuhet në postimin e Federatës Shqiptare të Mundjes.

Kujtojmë që Valiev  kaloi me sukses katër përballje të vështira për të arritur në finale, duke treguar nivel të jashtëzakonshëm.

Në sfidën gjysmëfinale, 26-vjeçari fitoi 6-4 kundër rusit Zaurbek Sidakov, ndërsa më shumë ka vuajtur në çerekfinale ku fitoi në sekondat e fundit 7-5 me përbysje kundër amerikanit David Carr.

LEXONI GJITHASHTU:

• Detaje nga finalja e Botërorit të Mundjes, Valiev pësoi dëmtim të rëndë në gju
• Mundësi Valiev fiton medaljen e artë në Kampionatin Botëror të Forcave Ushtarake
• “Tradhtar”- Mundësi Valiev reagon për incidentin me Mamiashvili: S’i detyrohem asgjë