Dhuna “fiton” derbin ndaj Partizanit e Tiranës, kreu i Superligës i takon Egnatias

8 kartona të kuq, përplasje në shkallët e stadiumit dhe në fushë, kjo ishte panorama e klasikes Partizani-Tirana në Superligë. Ndeshja u mbyll pa fitues, ndërsa klubi i kuq fajësoi për situatën policinë e shtetit.

Kurrësesi nuk mund të konsiderohet futboll, madje dhe në ndeshje boksi veprimet janë të moderuara, por në klasiken e futbollit shqiptar mes Partizanit dhe Tiranës përplasjet u kthyen në kryefjalë. Në këto pamje të filmuara përpara nisjes së duelit, tifozët u konfliktuan fizikisht me njëri-tjetrin dhe ndërhyrja e vonë e policisë bëri që të kishte edhe të lënduar, madje edhe arrestime. Për këtë situatë, Partizani nëpërmjet një njoftimi fajësoi policinë e shtetit, duke pohuar se refuzuan t’i përgjigjen kërkesës së klubit.

Ndeshja nisi me 30 minuta vonesë dhe vetëm futboll që nuk prodhoi, pasi dhuna do të bëhej pjesë edhe në fundin e lojës, por këtë herë mes lojtarëve dhe stafeve teknike. 8 kartona të kuq në përfundim u dhanë nga gjyqtari i takimit, i cili u kujdes vazhdimisht të mos lejonte lojën e ashpër. Sa i përket rezultatit, u mbyll 1-1 me golat e Ernest dhe Sembene.

Superliga vijoi me përballjet e tjera, ku Egnatia fitoi ndaj Elbasanit dhe Vllaznia mundi Bylisin. Rrogozhinasit qëndrojnë në krye të klasifikimit me 45 pikë, 2 më tepër se shkodranët.

LEXONI GJITHASHTU:

• Vllaznia pret Egnatian, trajneri Bradric vlerëson Tetovën dhe të tijët
• Java e 22-të e Superligës, Egnatia rikthehet në krye të klasifikimit