Digjitalizimi në arsim, lehtësira për prindërit dhe mësuesit

Digjitalizimi i arsimit parauniversitar do t’ua bëjë shumë më të lehtë marrëdhënien me mësuesit, prindërve e nxënësve.

Me një klikim në smip.al prindërit mund të marrin vetë gjithë informacionin për fëmijët e tyre, mund të shohin vlerësimet e çdo lënde, komentet e ndryshme nga mësuesit, e të kuptojnë mbi të gjitha kur fëmija ka munguar pa arsye e pa dijeninë e tyre në shkollë.

Me një email apo sms, ata do të informohen në kohë reale për gjithçka, pa pasur nevojë të shkojnë në takime me mësuesit.

Smip.al do të krijojë lehtësira të mëdha jo vetëm për prindërit por edhe për nxënësit dhe stafet pedagogjike.

Tashmë çdo nxënës mund të aksesojë sistemin e të shohë lëndët që zhvillohen në klasën e tyre, temat që shfaqen për atë lëndë si dhe do të mund të shkarkojnë lehtësisht çdo dokument e video që mësuesit kanë ngarkuar specifikisht për atë temë, kurse mësuesit do të kryejnë shumë procese deri më sot fizike, online.

Aplikacioni mobile është dizenjuar në mënyrë që të jetë lehtësisht i aksesueshëm për këdo dhe kudo. Është një sistem që lidh fort tre hallka kaq shumë të rëndësishme, në një trinom të pashmangshëm: mësues- nxënës- prind.