Rreth 8,900 persona në Shqipëri janë të diagnostikuar dhe trajtohen për Parkinson.

Në Ditën Botërore të Parkinsonit, ekspertët bëjnë me dije se si meshkujt, ashtu edhe femrat në moshën e tretë, janë të rrezikuar nga kjo sëmundje degjenerative e sistemit nervor.

Duke folur për Euronews Albania mjekja neurologe Mira Rakacolli thotë se Shqipëria hyn në vendet që kanë një prevalencë relativisht të lartë të kësaj sëmundjeje.

Por cilat janë shenjat që mund të nisin sëmundjen?

“Parkinsoni zakonisht fillon pas moshës 60-vjeçare, por kemi edhe raste të të rinjve me ketë sëmundje. Shenjat kryesore janë dridhja, zakonisht dridhje në qetësi, jo kur bëhen veprime, ngadalësimi në lëvizje, ngrirja dhe çrregullimet në ecje. Sëmundja fillon fshehurazi, në mënyrë graduale, dhe mund të fillojë me ndonjë dhimbje në krah, ndërsa më pas shenjat vijnë duke u shtuar,” thotë mejkja Mira Rakacolli.

Edhe pse sëmundja njihet prej 200 vitesh, ende nuk dihen shkaqet e saj, por Rakacolli thotë se ka mjekime për ta mbajtur atë nën kontroll.

“Ne Shqipëri ofrojmë mjekim edhe për fazat e avancuara të Parkinsonit, mjekime të cilat janë të rimbursueshme. Se fundmi, në QSUT është realizuar edhe ndërhyrja kirurgjikale,” thotë mejkja Rakacolli.

Parkinsoni është një ndër sëmundjet neurologjike mjaft të përhapura në botë, dhe incidenca e saj rritet me kalimin e moshës.

LEXONI GJITHASHTU:

• Teknologjia e re përmirëson ndjeshëm jetën e pacientëve me Parkinson
• Neurokirurgu: Paraliza, një ndër rreziqet e operacionit për Parkinsonin