DnV: Fushata zgjedhore në Kosovë po karakterizohet nga gjuha nxitëse e urrejtjes

Rrjeti i organizatave joqeveritare, Demokracia në Veprim (DnV), tha se që nga fillimi i fushatës zgjedhore për zgjedhjet parlamentare të 9 shkurtit është vërejtur gjuhë nxitëse dhe e urrejtjes mbi baza politike, si në tubime politike, por edhe në komente në platforma online.

Në një konferencë për media më 18 janar, Eugen Cakolli nga DnV, tha se gjatë kësaj jave ka pasur përkeqësim të gjuhës së ashpër të përdorur në fushatë.

“Këtë javë kemi pasur ashpërsim e përkeqësim të gjuhës së përdorur në fushatë, me plotë 25 aktivitete gjatë monitorimit të së cilave janë raportuar raste të përdorimit të gjuhës së nxitjes apo urrejtjes, kryesisht mbi baza politike”, tha ai.

Sipas tij, gjuhë e tillë është përdorur më së shumti gjatë aktiviteteve të partisë në pushtet, Lëvizja Vetëvendosje, por përjashtim nuk kanë bërë pas partitë e tjera.

Ai tha se gjatë monitorimit, dhjetë raste të përdorimit të gjuhës nxitëse, të urrejtjes dhe fyese janë identifikuar në aktivitetet e Lidhjes Demokratike të Kosovës, gjashtë në aktivitetet e Partisë Demokratike dhe katër në atë të Aleancës për Ardhmërinë e Kosovës.

Më herët gjatë javës, Paneli Zgjedhor për Ankesa dhe Parashtresa (PZAP) gjobiti me mijëra euro partitë politike.

LDK-ja u gjobit me 20 mijë euro për gjuhë të urrejtjes, AAK-ja me 12 mijë dhe LVV-ja u gjobit me 3 mijë euro për shkelje të ndryshme të Kodit të Mirësjelljes gjatë fushatës zgjedhore, e cila nisi më 11 janar.

Gjatë konferencës për media, Cakolli po ashtu njoftoi se kanë monitoruar edhe aktivitetin online të 679 kandidatëve për deputetë. DnV-ja, tha ai, ka identifikuar 50 raste kur të njëjtit kanë qenë shënjestër apo edhe autorë të gjuhës nxitëse e të urrejtjes, por edhe lajmeve të rreme.

E sa i përket komenteve në postimet e kandidatëve, po ashtu është vërejtur gjuhë e urrejtjes në 600 mijë komente të bëra për zgjedhje dhe 7 për qind e komenteve kanë pasur për cak kandidatet gra, tha Cakolli.

DnV-ja po ashtu tha se po vazhdon trendi i mospjesëmarrjes së kandidateve gra në fushatën zgjedhore.

LEXONI GJITHASHTU:

• Dy muaj nga vrasja, prindërit e Martinit dhe Luisi në marshimin-protestë në Tiranë
• Psikologia: Historinë e Parashqevisë na e treguan të tjerët dhe jo këngëtarja