“Do ankimoj”, Hoxha: Isha fitues, tjetërsuan rezultatin me kutinë e burgut

Kandiati i koalicionit Bashkë Fitojmë për Rrogozhinën, Shkëlqim Hoxha tha se ai ishte në avantazh deri në momentin e fundit ku sipas tij rezultati përfundimtar u tjetërsua nga kutia e votimit nga burgu.

Sipas tij në këtë kuti të gjithë të burgosurit kishin votuar për kandidatin socialist Edison Memolla, i cili fitoi me 23 vota më shumë.

I ftuar në një lidhje direkte për Eurnews Albania ai tha se numërimi i kutisë së të burgosurve është bërë në mungesë transparence, pasi nuk dihet se kush lejohej të votonte dhe se kush nuk lejohej.

“Procesi zgjedhor në bashki përfundoi dhe populli i Rrogozhinës dha verdiktin e tij dhe votoi për mua. Domethënë si bashki unë jam fitues, ndërsa në fund fare me kutinë burgut, që është është në konflikt të plotë interesi u tjetërsua rezultati i zgjedhjeve.

Një kuti burgu ku të gjithë burgosurit votojnë pro kandidatit që është kryetari i bashkisë aktual e për çudi të gjithë të burgosurit votojnë pro atij. Por më e keqja është se nuk ka asnjë lloj transparence, se kujt i lejohet dhe kujt nuk i lejohet  të votojë nga burgu”,-tha ai për Euronews Albania, ndërkohë Hoxha ka reaguar edhe më herët me anë të një statusi në Facebook ku shkruan:

“Ju votuat për ndryshimin, për ta ushtruar ju pushtetin, duke përbuzur e përballur njëkohësisht makinerinë e pushtetit, që bëri gjithçka, për të deformuar vullnetin tuaj.

Banorët e Rrogozhinës na votuan, na besuan përgjegjësinë e drejtimit të Bashkisë. Qeveria e Pushteti në mënyrë të paligjshme hartojnë lista me banorë ekstra, që nuk e ndjejnë përgjegjësinë e votës, e kështu tentojnë të tjetërsojnë fitoren. Miqtë e mi, ka dhjetëra arsye që beteja ligjore do kthejë hakun te ju!”

LEXONI GJITHASHTU:

• Shqipëria mbështet kandidaturën e Kosovës për Lojërat Mesdhetare 2030
• Numërimi votave për këshillat bashkiak, sa këshilltarë kanë fituar deri tani partitë