Dorëhiqet prefekti i Lezhës, Gjokë Jaku

Prefekti i Lezhës, Gjokë Jaku ka dhënë të hënën dorëheqjen nga detyra, pas 3 vitesh në këtë funksion.

Ndonëse Jaku nuk jep asnjë arsye për tërheqjen e tij, ai e ka ‘justifikuar’ me një shprehje të Martin Luter Kingut; “Jeta jonë fillon të mbarojë ditën kur heshtim përballë gjërave që kanë rëndësi”.

“Sot kam dorëzuar dorëheqjen time nga funksioni i Prefektit të Qarkut Lezhë. Kjo periudhë 3 vjeçare ka qenë një eksperiencë e vlefshme për mua e pas asaj të Q. Shkodër në vitet 1997-2000, më ka plotësuar CV time por jo vetëm”, shprehet Jaku.

Gjokë Jaku më parë ka mbajtur detyrën e prefektit të Shkodrës, ka drejtuar Bashkinë Lezhë si dhe ka qenë deputet i Partisë Socialiste.

Jaku, i cili në qershor 2019 u emërua Prefekt i Qarkut të Lezhës, ka mbajtur gjithashtu edhe postin e zv.ministrit të Bujqësisë.