Durrës| Futën sende të përfituara nga veprimtari kriminale, procedohen dy shtetas

Policia ka identifikuar 2 drejtues autobusi në portin e Durrësit të cilët kanë tentuar të fusin në Shqipëri sende me vlerë, për të cilat dyshohet se janë përfituar nga veprimtari kriminale.

Nga ndërhyrja janë sekuestruar një sasi bizhuterish floriri dhe argjendi, 2 celuarë dhe 2 pasaporta.

Bëhet me dije se ndaj dy shtetasve me iniciale E. N., 34 vjeç dhe F. R., 37 vjeç, nisi procedimi në gjendje të lirë për të dy këta shtetas, për veprat penale “Mosdeklarimi në kufi i të hollave dhe i sendeve me vlerë” dhe “Përvetësimi i parave ose mallrave që rrjedhin nga vepra penale ose veprimtaria kriminale”.

Në vijim, si rezultat i hetimeve u identifikua dhe u shpall në kërkim shtetasi M. T., 59 vjeç, i cili dyshohet se do të priste bizhuteritë në Shqipëri.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

LEXONI GJITHASHTU:

• Makina përplaset me shtyllën në Shëngjin, ndërron jetë 30-vjeçari
• 72-vjeçari që u gjet në përrua në Memaliaj është vrarë, u qëllua me sëpatë e thikë