Dy satelitët, Rama: Inspektorët, të pamundur të raportojnë një realitet tjetër

Kryeministri Edi Rama deklaron se me dy satelitët e rinj do të monitorohet gjithë territori i vendit.

Gjatë prezantimit të Shërbimit Satelitor në Republikën e Shqipërisë, kreu i qeverisë nënvizoi se do të jetë e pamundur që inspektorët e zonës të raportojnë një realitet tjetër, sa i përket ndërtimeve pa leje apo kultivimit të drogës.

“Me satelitët do kemi mundësi të shohim çfarë ndodh në shumë fusha. Do kemi mundësi të shohim të gjitha të mbjellat. Do të jetë e lehtë për Ministrinë e Bujqësisë që të identifikojë vërtetësinë e të gjitha vetë-deklarimeve që lidhen me nevojën për të subvencionuar naftën dhe sasinë e të mbjellave në territor. Ne do krijojmë një bazë të dhënash të rëndësishme që na japin mundësi të bëjmë shumë analiza.

Gjithë ndërhyrjet në pyje, apo gërryerjen e lumenjve do i kemi në një pasqyrë. Do të ketë shumë sy mbi territorin. Do jetë e pamundur që sytë e inspektorit të zonës t’i shesin shtetit një realitet të paqenë në këmbim të ryshfetit. Nuk do ketë falsifikime në procesin e legalizimit. Është një ditë e shënuar realisht”, u shpreh Rama.

Ndërkohë, ministri i Mbrojtes Niko Peleshi deklaroi se sot do nënshkruhet kontrata e Shërbimit Satelitor në fushën e mbrojtjes dhe sigurisë.

Sipas ministrit, kjo kontratë kap vlerën e 6 mln dollarëve.

LEXONI GJITHASHTU:

• 6 mln dollarë kontratë, Peleshi: 2 satelitë për monitorimin e territorit
• Rama: Shumë shpejt do të marrim dronët e armatosur, për çfarë do të shërbejnë