Efektet e sanksioneve nisin të “gërryejnë” Rusinë

Kur presidenti Vladimir Putin njoftoi ndërhyrjen ushtarake në Ukrainë 3 muaj më parë, konflikti dukej se ishte shumë larg nga territori rus.

Megjithatë, brenda pak ditësh lufta mbërriti, jo në formën e raketave dhe mortajave, por me një valë të paprecedent sanksionesh nga qeveritë perëndimore dhe largimesh të kompanive të huaja.

Shumë rusë të zakonshëm po përpiqen t’u bëjnë ballë efekteve financiare dhe izolimit.

“Nëse shkoni në qendrat tregtare të Moskës mund të shihni se shumë dyqane mode, kryesisht të markave perëndimore, kanë ulur qepenin. Raftet e tyre janë ende plot dhe dritat të ndezura, por nuk janë të hapura. Kjo do të thotë se nuk janë tërhequr ende, por presin të shohin se çfarë do ndodhë”, tha Chris Weafer, drejtor i ‘Macro-Advisory’.

Edhe prodhuesit e mëdhenj të automjeteve janë larguar, pavarësisht investimeve të mëdha në Rusi.

“Po shohim përkeqësim të ekonomisë në një sërë sektorësh. Kompanitë po paralajmërojnë se po u mbarojnë stoqet e pjesëve të këmbimit. Shumë prej tyre i kanë kaluar punonjësit në kohë të pjesshme dhe të tjera i kanë paralajmëruar se mund të mbyllin dyert. Ndaj ekziston frika se papunësia do të rritet gjatë muajve të verës, se do të ketë një rënie të konsumit, shitjeve dhe investimeve”, u shpreh Chris Weafer.

Në ditët e para të operacionit, rubla ruse humbi gjysmën e vlerës së saj. Përpjekjet e qeverisë për ta forcuar atë patën njëfarë suksesi, por në aspektin e konsumit dhe shpenzimeve situata flet ndryshe.

LEXONI GJITHASHTU:

• Forcat ruse po kryejnë masakër në Donbas, sipas Zelenskit