Egnatia “shkatërron” Vllazninë në finale dhe fiton titullin kampion

Egnatia ka shkruar historinë në futbollin shqiptar, duke u shpallur për të dytin vit radhazi kampione e Kategorisë Superiore.

Skuadra rrogozhinase dominoi në finalen e “Final Four”, duke mposhtur me rezultatin bindës 4-0 Vllazninë në një sfidë të zhvilluar në “Arenën Kombëtare”.

Heroi i takimit ishte mesfushori Regi Lushkja, autor i dy golave. Ai zhbllokoi shifrat që në minutën e 6-të pas një asisti nga Bakayoko, dhe më pas dyfishoi rezultatin me një goditje me kokë në minutën e 49-të.

Në minutën e 83-të, Leo Melo i sapo futur në lojë realizoi golin e tretë për Egnatian, ndërsa në kohën shtesë, Ujka vulosi fitoren me golin e katërt.

Takimi u gjykua nga arbitri i njohur polak, Szymon Marciniak, dhe u karakterizua nga një dominim i qartë i Egnatias, që konfirmoi forcën e saj pas përfundimit të sezonit të rregullt në krye të tabelës.

Ndërkohë, Vllaznia do të duhet të presë ende për të rikthyer titullin në Shkodër, një trofe që mungon prej 24 vitesh.

LEXONI GJITHASHTU:

• FSHF Sunday League/ ATS mund Dajtin dhe fiton titullin kampion
• Fitorja me Dinamon, Tirana në play-out, Partizani në Final 4! Bien Skënderbeu e Laçi