EKSKLUZIVE/ Bosi belg i drogës në sitën e SPAK, kompani import-eksporti në Shqipëri

Autoritetet belge kanë vënë në lëvizje SPAK për të hetuar aktivitetin ekonomik në Shqipëri të një bosi droge të akuzuar për trafikun e 1.9 tonëve kokainë nga Amerika Latine.

Belgu rezulton se kishte hapur një kompani në Shqipëri ku kishte dhe hyrje-dalje të shpeshta.

Përmes një letër-porosie prokuroria federale e Brukselit i ka kërkuar SPAK të verifikojë aktivitetin tregtar në Shqipëri të një  bosi droge.

D.L shtetas belg, është arrestuar në tetor të vitit të kaluar në Liezh si drejtues i një organizate kriminale që kishte trafikuar 1.9 ton kokainë nga Amerika latine përmes transportit me kontejner në portin e anversit. Droga fshihej në rroba, goma, qymyr dhe mallra të tjerë dhe më pas nxirrej përmes përpunimit kimik në një laborator që u zbulua nga policia Belge.

Autoritetet atje kanë zbuluar se 43-vjeçari kishte hapur dhe zotëronte një kompani në Shqipëri me aktivitet të gjerë tregtar, nga zhvillimi i teknologjive të reja tek import-eksporti me te gjitha llojet e mallrave dhe produkteve.

Në kuadër të hetimit pasuror autoritetet belge i kanë kërkuar SPAK të kryejë një sërë veprimesh verifikuese për kompaninë në fjalë dhe shtetasin D.L, mes tyre në dogana, kadastër , banka por edhe kontrolle në vendqëndrimet e tij në Shqipëri, përfshirë edhe hyrje-daljet prej vitit 2016.

Për ecurinë e kësaj letërporosie në Shqipëri belgët kanë kërkuar autorizim që të jenë prezent edhe një gjyqtar federal dhe 2 agjentë të policisë. Gjatë 3 viteve SPAK i është përgjigjur qindra letërporosive për ndihmë juridike të autoriteteve të drejtësisë nga shumë vende të euroje dhe më gjerë.

LEXONI GJITHASHTU:

• ‘Investoni në bono thesari’, Qeveria u bën thirrje qytetarëve: Do dilni të fituar
• Qepët e Korçës ngelën në tokë, fermerët: Po humbim lekët, nuk ka treg për shitje