Elbasani përgatitet për Ditën e Verës, festimet nisën me nxënësit e shkollave

Kur kanë mbetur vetëm pak ditë nga 14 Marsi, në Elbasan ndihet atmosfera festive. Përveç gatimeve tradicionale, qytetarët shprehen të entuziast për traditën e kësaj feste, duke ftuar çdo shqiptar të bashkohet në këto ditë që simbolizojnë ardhjen e stinës së ngrohtë.

“Duhet të vini në Elbasan për të parë çfarë feste kemi. Ballokume, revani – gjërat më të bukura janë këtu. Pse është e veçantë Dita e Verës në Elbasan? Sepse ka një traditë elbasanllie që të tjerët nuk mund ta kenë ose ta imitojnë. Ato gjërat që bëjmë ne, nuk i bën njeri tjetër. Nanat tona i bëjnë, femijët tanë do t’i vazhdojnë. Nuk e ndërroj Elbasanin për asgjë tjetër – janë gra të dashura, jemi fisnike. Ka lezet të jesh në Elbasan.”

“Gëzuar Ditën e Verës! Ejani të festoni në Elbasan”, thonë ata.

Festimet kanë nisur me aktivitetet për nxënësit e shkollave dhe do të vazhdojnë me katër koncerte të mëdha, panaire promovuese dhe festivalin e ballokumeve. Kulmi pritet të jetë nga 12 deri më 14 Mars, me artistë të njohur të muzikës shqiptare që do t’i japin qytetit ritëm dhe energji.

“Bashkia Elbasan sivjet ka sjellë si risi zbukurimin e shumë pjesëve të qytetit që vitet e kaluara nuk i kemi pasur mundësi t’i zbukurojmë. Sheshi ka gjallëri dhe njerëzit janë të lumtur. Festimet do t’i nisim më 9 Mars me aktivitetet për nxënësit e shkollave dhe do të kulmojnë më 12, 13 dhe 14 Mars me koncerte që do të sjellin këngëtarë me emra të mëdhenj të muzikës shqiptare. Qyteti i Elbasanit i mirëpret vizitorët dhe ftoj të gjithë ata që duan të festojnë Ditën e Verës të rezervojnë dhe të përjetojnë Elbasanin si një paketë të plotë turistike”, thotë Klaudia Krasnika, nënkryetare e Bashkisë Elbasan.

Elbasani pritet të mirëpresë mijëra vizitorë nga e gjithë Shqipëria, sepse kur festohet Dita e Verës, zemra e Shqipërisë rreh pikërisht në qytetin e traditës.