Emigracioni në BE, shqiptarët të dytët për numrin e lartë të azilantëve të kthyer

Mbi 96 mijë qytetarë nga vende jo anëtare të Bashkimit Europian u urdhëruan të largohen nga një vend i BE-së, në tremujorin e dytë të vitit 2024, ndërkohë që 25,285 persona u kthyen pas marrjes së urdhrit për largim.

Krahasuar me tremujorin e parë të vitit 2024, numri i urdhrave për largim ra me 7%, ndërsa numri i kthimeve në vendet e treta u ul me 3.9%.

Në krahasim me të njëjtën periudhë të vitit 2023, numri i qytetarëve  nga vende jo antare të BE të urdhëruar të largohen ra me 10%, ndërsa numri i të kthyerve u rrit me 21.3%.

Sipas të dhënave të publikuar nga Eurostat, qytetarët algjerianë dhe marokenë përbënin pjesën më të madhe të qytetarëve që u urdhëruan të largoheshin nga një vend i Bashkimit Europian, secili me 7% të totalit.  Pas tyre vinin qytetarët turq dhe sirianë, secili me 6%.

Ndër qytetarët që u kthyen pjesën më të madhe e përbënin qytetarët gjeorgjianë (10%), të ndjekur nga ata shqiptarë (8%) dhe turq (7%).

Nga të dhënat kombëtare, Franca kryesoi listën me numrin më të madh të qytetarëve që u urdhëruan të largohen, me 31,195 raste, e ndjekur nga Gjermania me 12,885 dhe Greqia me 6,555.

LEXONI GJITHASHTU:

• Mbahet në Francë gjyqi ndaj Marine Le Pen, rrezikohet kariera e saj politike
• Raporti: Europa po përballet me “sfida ekzistenciale” për të rritur prodhimin