Escobar do të marrë pjesë në takimin Kurti-Vuçiç në Ohër

I dërguari i posaçëm i Uashingtonit për Ballkanin Perëndimor, Gabriel Escobar do të marrë pjesë në cilësinë e vëzhguesit në rundin e ri të dialogut mes Kosovës dhe Serbisë, që do të mbahet më 18 mars në Ohër të Maqedonisë së Veriut.

Kështu konfirmoi për Radion Evropa e Lirë Ambasada amerikane në Shkup.

“Shtetet e Bashkuara mbështesin plotësisht dialogun e lehtësuar nga BE-ja. Escobar do të udhëtojë për në Ohër të Maqedonisë së Veriut për të mbështetur këtë proces”, thanë për REL-in nga Ambasada amerikane në Shkup.

Në takimin midis kryeministrit të Kosovës, Albin Kurti, dhe presidentit të Serbisë, Aleksandar Vuçiç, blloku evropian pret që liderët të pajtohen për planin e zbatimit të propozimit evropian për normalizimin e raporteve.

Kurti dhe Vuçiç më 27 shkurt u pajtuan se nuk ka më nevojë për negociata për propozimin dhe shprehën gatishmërinë për të punuar në planin e zbatimit.

Më 18 mars, shefi i diplomacisë së BE-së, Josep Borrell, dhe i dërguari i bllokut për dialogun, Miroslav Lajçak, fillimisht do të mbajnë takime dypalëshe me Kurtin dhe Vuçiç, dhe më pas është paraparë të mbahet takimi i përbashkët.

LEXONI GJITHASHTU

• Pheniani: Stërvitjet e SHBA-së dhe Koresë së Jugut, provokim i rrezikshëm
• Koreja e Veriut lëshon raketë balistike përpara samitit Kore-Japoni
• SHBA dhe Rusia në bisedime pas rrëzimit të dronit në Detin e Zi