“Final 4”, Vllaznia mund Dinamo dhe siguron finalen e madhe për titullin kampion

Vllaznia është skuadra e parë që siguron finalen e madhe për titullin kampion në Superligën shqiptare.

Kuqeblutë triumfuan me rezultatin 2-1 ndaj Dinamo City-t në gjysmëfinalen e parë të “Final 4”, të zhvilluar në “Arenën Kombëtare”.

Gjyqtari Eldorjan Hamiti akordoi dy 11-metërsha për Vllazninë, pas prekjes me dorë të topit nga lojtarët e Dinamos, të cilat u shndërruan në gola nga Bekim Balaj.

Këto dy gola në pjesën e parë ishin vendimtarë për suksesin e shkodranëve, ndërsa Dinamo reagoi në fraksionin e dytë, duke ngushtuar diferencën në minutën e 52-të me golin e Itodo Mandelës por nuk arriti ta përmbysë rezultatin.

Pavarësisht presionit të bluve, Vllaznia administroi avantazhin deri në fund dhe siguroi biletën për finalen e madhe të 12 majit, ku do të luajë për titullin kampion të edicionit 2024–2025.

Formacionet titullare:

Vllaznia: Jukaj, Repaj, Stojanoviç, Gurishta, Jago, Krymi, Deliu, Qata, Mala, Gruda, Balaj.

Dinamo City: Teqja, Hoxha, Aliji, Lorran, Meksi, Karamba, Qefalija, Zabërgja, Vila, Nani, Mandela.

Gjysmëfinalja e dytë, mes Egnatias dhe Partizanit, do të zhvillohet këtë të hënë, më 5 maj, në orën 20:00, në “Arenën Kombëtare”.

Fituesi i kësaj ndeshje do të përballet me Vllazninë në finalen e madhe të 12 majit.

LEXONI GJITHASHTU:

• Vllaznia e bindur për finale, Brdaric: Të kualifikohemi në kohën e rregullt