Flet nëna e një nga fëmijëve të dhunuar në kopsht: Jam e shokuar! Kishte mbi 1 vit

Një ngjarje e rëndë është publikuar këtë të enjte pas një denoncimi të bërë nga Lorenc Rrapa për edukatoren e djalit të tij, Rudina Gërdani, e cila sipas tij ka ushtruar dhunë ndaj fëmijëve për të cilët duhet të kujdesej në kopshtin privat “Gledis”.

“Më kapi Rudi. Unë i thash puçe Priamin, Rudi më tërhoqi te dora fort”, kanë qenë këto fjalët e 3-vjeçarit Priam dhe një shenjë e nxirë në krahun e tij të cilat e nxitën Lorenc Rrapën që të kërkonte pamjet nga kamerat e kopshtit.

I ftuar në emisionin “People” në Euronews Albania, Lorenc Rrapa tha se në pamjet filimike pa se djali i tij nuk ishte i vetmi që ishte dhunuar, por ishin edhe tre fëmijë të tjerë. Pasi ka siguruar videot ai ka kontaktuar me nënën e një djali tjetër të dhunuar e cila në një lidhje telefonike për emisionin tha se ndihej e shokuar nga ngjarja por edhe nga mosreagimi i drejtuesve të kopshtit në momentin kur e mësuan se edukatorja kishte dhunuar fëmijët.

Sipas saj ngjarjen ajo e mësoi nga Lorenci, ndërsa drejtoresha e kopshtit nuk i kishte kërkuar as falje për situatën që djali i saj kishte përjetuar në kopsht.

“Djali ka një vit e 4 muaj që shkon në këtë kopsht. Kam tre ditë që e kam djalin me temperaturë. Nuk po e marr dot veten. Ja di për faleminderit Lorencit. Drejtoresha e kopshtit nuk mori guximin apo mundimin pasi pa videon që të më thotë se çfarë ka ndodhur. Ajo ka thënë vetëm në grupin e kopshtit me një mesazh që ka ndodhur një incident me një fëmijë në kopsht dhe kishin pushuar edukatoren”,-tha nëna e një nga fëmijëve të dhunuar.

LEXONI GJITHASHTU: 

• Ekskluzive! Ja kush është edukatorja Rudina Gërdani që dhunoi 3-vjeçarin…
• “Djali 3-vjeç më tha se e dhunoi edukatorja”, babai: Kërkova pamjet e kamerave…