Formula 1, Alpine-Mercedes nga viti 2026

Skuadra franceze Alpine arriti marrëveshjen për marrjen e motorrëve Mercedes për periudhën 2026-2030. Brenda saj përfshihet edhe suporti me kutinë e marsheve për të paktën një vit, pasi Alpine planifikon të ndërtojë një kuti marshesh në Enstone prej vitit 2027.

Një muaj më parë Alpine konfirmoi mbylljen e programit të prodhimit të motorrëve si pjesë e projektit transformues ‘Hypertech’. Në këto kushte skuadra ka qënë në bisedime me disa prodhues por Mercedes ishte ai që bindi më shumë.

Ndërkohë Alpine do të prodhojë motorrin e saj edhe për vitin 2025 që do të jetë i fundit me rregullat aktuale. Ndërsa në vitin 2026 fokusi do të jetë në zhvillimin e baterisë dhe karburantin 100% të pastër.

Zyrtarizimi për kontratën e re vjen pas një fundjave të jashtëzakonshme për Alpine në Brazil që e pa skuadrën franceze të bëjë një kapërcim masiv në klasifikim. Aktualisht Alpine është në vendin e 6 në klasifikimin e konstruktorëve dhe po kalon një periudhë tranzicioni gjatë së cilës Oli Oakes mori detyrën e Team Principal dhe Flavio Briatore u kthye në seli si Këshilltar Ekzekutiv.

LEXONI GJITHASHTU:

• Me pranga poshtë xhaketës, Ilir Beqja rikthehet në Kuvend për të dëshmuar
• Donald Trump dhe presidenti Joe Biden do të takohen sot në Shtëpinë e Bardhë