Formula 1 zyrtarizon kalendarin Sprint për sezonin 2026

Formula 1 ka zyrtarizuar kalendarin e garave Sprint për sezonin 2026, duke përzgjedhur gjashtë pista që do të presin formatin e shkurtuar dhe dinamik të fundjavës. Shangai, Miami, Montreali, Silverstone, Zandvoort dhe Singapori janë destinacionet ku do të zhvillohen garat Sprint, ndërsa tri prej tyre Kanadaja, Holanda dhe Singapori përfshihen për herë të parë në këtë format.

Këto gara pritet të sjellin një dozë të shtuar spektakli dhe strategjie në mes të një sezoni që shihet si pikë kthese në historinë e këtij sporti. Viti 2026 do të shënojë nisjen e epokës së re të rregulloreve teknike, të cilat pritet të transformojnë ndjeshëm makinat dhe konkurrencën në pistë.

Ndërkohë, Kampionati Botëror i Formula 1 për vitin 2026 do të hapet më 6-8 mars në pistën e ‘Albert Park’ në Melburn të Australisë, ndërsa mbyllja do të bëhet më 4-6 dhjetor në ‘Yas Marina’, me Çmimin e Madh të Abu Dhabit. Me gjithsej 24 gara të planifikuara, ky sezon pritet të jetë një nga më të gjatat dhe më emocionuesit në historinë e këtij sporti elitar.