Foshnja shpëtohet nga barku i nënës së vdekur pas sulmit izraelit

Sabreen kishte vdekur para se të mund ta shikonte në sy foshnjën ose ta mbante atë.

Nëna e re kishte mbajtur fëmijën e saj në shtatë muaj e gjysmë shtatzënie. Ishin ditë e net frike të vazhdueshme, por Sabreen shpresonte se fati i familjes do të qëndronte derisa të mbaronte lufta.

Ai fat u zhduk në zhurmën dhe zjarrin e një shpërthimi një orë para mesnatës së 20 prillit.

Izraelitët hodhën një bombë në shtëpinë e familjes al-Sakani në Rafah, ku Sabreen, së bashku me burrin e saj dhe vajzën tjetër të çiftit – Malak tre vjeçare – ishin në gjumë.

Sabreen pësoi lëndime të mëdha dhe burri i saj dhe Malak u vranë, por foshnja ishte ende gjallë në barkun e nënës së saj kur punonjësit e shpëtimit arritën në vend.

Ata e çuan Sabreen në spital, ku mjekët kryen një prerje cezariane urgjente për të lindur fëmijën.

Sabreen nuk mundi të shpëtohej, por mjekët punuan për të ringjallur foshnjën, duke i prekur butësisht gjoksin për të stimuluar frymëmarrjen. Ajri u derdh në mushkëri.

“Ajo ka lindur me probleme të rënda të frymëmarrjes”, tha Dr Mohammed Salama, kreu i njësisë neonatale të urgjencës në Spitalin Emirati në Rafah.

Por foshnja – e cila peshonte vetëm 1.4 kg – i mbijetoi sprovës së lindjes së saj.

Mjeku shkroi fjalët “fëmija e dëshmorit Sabreen al-Sakani” në një copë shirit dhe e ngjiti në trupin e saj. Më pas ajo u vendos në një inkubator.

“Mund të themi se ka një përparim në gjendjen e saj shëndetësore”, tha Dr Salama.

“Por situata është ende në rrezik. Kjo sindromë e shqetësimit të frymëmarrjes është shkaktuar fillimisht nga lindja e parakohshme. Ky fëmijë duhet të ishte në barkun e nënës në këtë kohë, por asaj i është hequr kjo e drejtë”.

Mjeku pret që ajo të qëndrojë në spital deri në një muaj.

LEXONI GJITHASHTU:

• Gjinekologia: Vërtetohet nëse foshnja u vra para se nëna ta hidhte në lumë
• Mjekët në Gazë: Nënat nuk kanë qumësht për t’i ushqyer foshnjat