Kanioni i Holtës, një nga bukuritë natyrore të Gramshit vijon të jetë pika më e frekuentuar e zonës. Edhe në këto ditë të nxehta janë të shumtë turistët vendas apo të huaj që zgjedhin të kalojnë disa orë mes maleve dhe ujit të akullt që të ofron Kanioni i Holtës.

“Vij nga Republika Çeke, është hera e  parë që vij këtu është shumë bukur. Më pëlqen shumë Shqipëria në tërësi, por edhe kanioni i Holtës. Jemi duke eksploruar disa fshatra në vendin tuaj, një ndër to është edhe Gramshi. Shqipëria ka vende fantastike që ja vlen t’i vizitosh”, thotë një turist.

Kanioni ka një gjatësi rreth 3 km. Vizitorët befasohen dhe mahniten me ngjyrën karakteristike të ujit, shpatet e thepisura 100 – 150 metra, flora dhe fauna që shtrihet përreth. Lumi vende-vende arrin thellësinë deri në 3 metra. Të veçantë kanionin e bëjnë burimet e shumta termale, me ngjyrë të kaltër.

“Nga Maminasi, erdhëm ne ekskursion, na pëlqen të udhëtojmë, jemi 15 gra edhe erdhëm te kanionet e Holtes. Na pëlqen”, shprehet një tjetër.

Shpellat e shumta karakteristike nga dy anët e këtyre shpateve mbuluar dhe me zona pyjore me drurë pishe panje e bredhi, e bëjnë akoma më atraktiv këtë kanion.

Ajo çfarë natyra servir në këtë zonë i mrekullon vizitorët, por njëherazi janë të mendimit se ka nevojë për më shumë infrastukturë. Gramshi është konsideruar vitet e fundit si një nga befasitë turistike në mbarë vendin për shkak të kanioneve, shpellave, ujëvarave, liqeneve, pyjeve etj.

LEXONI GJITHASHTU:

• Kanionet e Holtës tërheqin turistë, guidat e huaja: 3 herë në javë jemi në Shqipëri
• Motori përplaset me dhinë, plagosen 2 vëllezër në Gramsh