Gazetari Brahaj: Siria do të jetë një shtet demokratik, do na lërë për të dëshiruar!

Gazetari Sokol Brahaj ishte i ftuar në Euronews Albania në emisionin ‘Balkan Talks’. Ai foli për përceptimin që ka Turqia në rolin që ka luajtur ajo në shembjen e regjimit të Bashar al-Assad gjatë 10 ditëve të fundit në Siri.

Gazetari gjithashtu u ndal dhe në vizitën që Sekretari i Shtetit të SHBA Antony Blinken ka zhvilluar me Ministrin e Jashtëm turk, Hakan Fidan.

“Turqia mund të mos përputhet me interesat amerikane. Amerika kërkon të bëjë një shtet të kurdëve në rajon, kurse Turqia nuk e do këtë gjë sepse ka pretendimet e veta. Por nga ana tjetër Amerika dhe Forcat e Mëdha dinë të ndajnë pushtetet”, tha gazetari.

Sipas Sokol Brahajt, Siria do të jetë një shtet demokratik dhe se nuk e ka më diktaturën që ajo ka pasur më parë.

“Çdo shtet sheh interesat e veta, pra interesat për Turqinë janë ndryshe dhe për Amerikën janë ndryshe. Nëse e shohim nga viti 2011 e deri tani, unë besoj që Siria do të jetë një shtet demokratik, do të na lërë shumë për të dëshiruar. Siria e ka larguar diktaturën që ka pasur. Edhe në Liban dhe Siri dhe në Irak, forca e Iranit është pakësuar”, shpjegoi gazetari.

Nga ana tjetër, Brahaj tha se forcat ushtarake detare dhe ajrore që janë në Siri, kanë mbledhur sistemet dhe janë duke negociouar me lidershipin e ri.

Ai shtoi se për Turqinë është më interes që Siria të vazhdojë të mbetet një shtet unitar por demokratik.