Girona drejt titullit kampion i dimrit në Spanjë, “leksion” Barcelonës në transfertë

Girona është padyshim surpriza më e bukur e këtij sezoni në kampionatin spanjoll. Skuadra e Michel u rikthye në krye të tabelës së klasifikimit në La Liga, pasi mposhti Barcelonën në një përballje spektakolare. Në stadiumin “Olimpik” të Barcelonës, miqtë edhe pse jo nje emër i madh në Spanjë, nuk e vendosën asnjëherë në dyshim fitoren teksa kaluan në avantazh që në minutën e 12 me Dovbyk.

Një gol i Lewandowskit me kokë solli barazpeshën e përkohshme.

Kur u duk se katalanasit do të projektonin përmbysjen, një supergol i Gutierrez vrau shpresat duke rikthyer avantazhin tek Girona. Fraksioni i dytë nisi në të njëjtën mënyrë aty ku Valery shënoi të tretin për miqtë, teksa Gundogan në minutën e dytë të shtesës shënoi golin e dytë për blaugranët duke cuar shifrat në 2-3.

Uruguaiani Stuani hyri si zëvendësues tek Girona, ku veterani shënoi dhe vulosi triumfin 2-4, duke bërë që Girona të vijojë ëndrrën e të rikthehet në krye me 41 pikë. Kjo humbja zhbën disi balancat tek Barcelona, ku prej ditësh tashmë kanë shpërthyer thashethemet se Xavi është drejt shkarkimit.

LEXONI GJITHASHTU:

• Shqipëria në “Euro 2024”, De Biasi zbulon arsyet: Sylvinho, i ri, por di të punojë
• Gianni de Biasi: Do doja të kisha në skuadër disa nga lojtarët që i ka Reja