Gjenden uniforma ushtarake në Veri, Sveçla: Mekanizmat terroriste do të shkatërrohen

Policia e Kosovës të premten pasdite ka kryer një operacion bastisjeje në Leposaviç. Gjatë operacionit, njësitë policore kanë gjetur uniforma të ndryshme në një shtëpi, përfshirë ato të policisë serbe dhe ushtarake.

Në lidhje me çështjen ministri i brendshëm i Kosovës, Xhelal Sveçla, deklaroi përmes një postimi në facebook, se këto mekanizma terroriste serbe që synojnë destabilizim do të shkatërrohen.

“Mekanizmi terrorist i Serbisë në veri të Republikës së Kosovës po çmontohet çdo ditë e më shumë.

Pas informatave inteligjente, në një shtëpi në fshatin Isev i Poshtëm në Komunën e Leposaviqit u gjetën dhjetëra uniforma të policisë se rregullt dhe asaj speciale serbe si dhe pjesë të uniformave të Policisë së Kosovës. Kjo është edhe një dëshmi e radhës se mekanizmat e sigurisë së Serbisë ishin dhe mbeten përgjegjësi i tentativës për destabilizim dhe aneksim të veriut të vendit tonë.

Falë vigjilencës dhe punës së pakursyer të gjitha institucioneve të sigurisë së Republikës së Kosovës kjo tentativë e Serbisë për destabilizim të vendit suksesshëm po parandalohet dhe luftohet.

Është detyrë dhe obligim i yni shërbimi ndaj të gjithë qytetarëve pa asnjë dallim, ndërkohë që është përkushtimi dhe vendosmëria jonë që me të gjitha mjetet ligjore të mbrojmë sovranitetin dhe integritetin territorial të vendit tonë. Të gjitha elementet terroriste që tentojnë destabilizim do të shkatërrohen pa kursim e përgjithmonë”, deklaroi në postimin e tij ministri Sveçla.

LEXONI GJITHASHTU:

• Përplasja Kurti-Osmani, letra që nxori në pah mosmarrëveshjet
• Kurti ngre alarmin: Rreziku i një lufte të re në rajon është i vërtetë