Gjermania kundër planit të Izraelit: Mos e dysfishoni popullsinë në Lartësitë Golan

Gjermania i kërkoi Izraelit këtë të hënë që të braktisë planin për dyfishimin e popullsisë izraelite në Lartësitë e Golanit, një territor i pushtuar nga Izraeli në skajin jugperëndimor të Sirisë. Plani, i shpallur nga qeveria izraelite të dielën, ka shkaktuar reagime të ashpra ndërkombëtare, përfshirë kritika nga disa vende të Lindjes së Mesme, si Arabia Saudite dhe Emiratet e Bashkuara Arabe.

Një zëdhënës i Ministrisë së Jashtme gjermane, Christian Wagner, deklaroi se kjo zonë “i përket Sirisë sipas ligjit ndërkombëtar” dhe se Izraeli është një fuqi pushtuese. Wagner i bëri thirrje Izraelit, aleatit të ngushtë të Gjermanisë, që të anulojë këtë plan.

Izraeli pushtoi Lartësitë e Golanit nga Siria gjatë Luftës Gjashtëditore të vitit 1967, në një konflikt kundër vendeve arabe që planifikonin pushtimin e shtetit hebre, dhe e aneksoi këtë territor në vitin 1981. Shumica e bashkësisë ndërkombëtare nuk e njeh aneksimin, përveç SHBA-së, e cila e njohu në vitin 2019.

Tensionet janë shtuar së fundmi pasi forcat rebele islamiste rrëzuan presidentin sirian Bashar al-Assad javën e kaluar, duke krijuar vakum pushteti. Në këtë kontekst, kryeministri izraelit Benjamin Netanyahu urdhëroi trupat që të kapnin një zonë mbrojtëse të çmilitarizuar, e cila ishte krijuar sipas Marrëveshjes së Shkëputjes së vitit 1974, pas Luftës së Yom Kipur. Megjithatë, plani i ri i Izraelit për zgjerimin e popullsisë përfshin vetëm zonën e aneksuar tashmë dhe jo zonën tampon të sapo-marrë.

Përveç kësaj, Izraeli ka ndërmarrë qindra sulme ajrore në Siri, duke synuar infrastrukturë ushtarake dhe armë strategjike, përfshirë armët kimike. Këto sulme synojnë të parandalojnë që armët të bien në duart e grupeve armiqësore, si Hezbollah në Liban, që mund t’i përdorin kundër shtetit hebre.

Zëdhënësi gjerman Wagner theksoi rëndësinë e respektimit të integritetit territorial të Sirisë, veçanërisht në këtë fazë të trazirave politike në vend. Ai pranoi se Izraeli ka një interes legjitim për të siguruar që armët e regjimit sirian të mos bien në “duart e gabuara”, por bëri thirrje që të gjitha palët të tregojnë përmbajtje për të shmangur përshkallëzimin e situatës. Ai përfundoi duke thënë se “Siria e shkatërruar nga lufta ka qenë për një kohë të gjatë skenë për ndërhyrje të fuqive të huaja”.

Edhe Turqia dënoi planin izraelit, duke e cilësuar atë si një përpjekje të Izraelit për të zgjeruar kufijtë përmes okupimit. Ministria e Jashtme turke deklaroi se ky vendim përbën një “fazë të re” në politikat zgjeruese të Izraelit.