GJKKO dënon për blerje votash Agim Locin

Gjykata e Posaçme e Shkallës së Parë për Korrupsionin dhe Krimin e Organizuar ka shpallur fajtor shtetasin Agim Sinan Locin për veprën penale të “Korrupsionit aktiv në zgjedhje”.

Ish-kryeplakun e Bërxullës në Tiranë, u dënua me 1 vit burgim, për blerje votash në favor të të bijës së tij, ish-kandidate e opozitës në Vorë.

Pas aplikimit të gjykimit të shkurtuar, gjykata vendosi të ulë dënimin me 1/3-ën, në 8 muaj burgim.

Gjykata në vendimin final urdhëroi pezullimin e dënimit me burgim, duke detyruar të pandehurin Agim Loci të kryejë 80 orë punë në interes publik. Kjo masë do të realizohet për një periudhë prej 6 muajsh, nën mbikëqyrjen e Shërbimit të Provës, dhe ka për qëllim rehabilitimin e tij dhe integrimin në shoqëri.

Të gjitha shpenzimet procedurale dhe ato gjyqësore do të ngarkohen mbi të pandehurin, duke theksuar përgjegjësinë e tij për veprimet e kryera.

Palët kanë të drejtë të bëjnë ankim ndaj këtij vendimi në Gjykatën e Posaçme të Apelit për Korrupsionin dhe Krimin e Organizuar brenda 15 ditëve nga shpallja e vendimit.

LEXONI GJITHASHTU:

• Folën në telefon për shit-blerje votash, GJKKO dënon Kristo Agalliun e Agron Durrajn
• “150 mijë pazari i fundit”/SPAK mbyll hetimet për 2 të akuzuar për shitblerje votash